Шэраг узнагарод заваявалі навучэнцы Браслаўскай дзіцячай школы мастацтваў на конкурсах рознага ўзроўню ў Беларусі і за яе межамі літаральна на працягу аднаго месяца.
Распачала зарапад музычных дыпломаў таленавітая Яраслава Быкава, вучаніца Таццяны Фярко, якая стала дыпламантам рэспубліканскага фестывалю-конкурсу «Музычныя іскрынкі» ў Клецку. Аднак дзяўчынка на гэтым не спынілася і праз некаторы час на конкурсе маладых выканаўцаў імя Міхаіла Грушвіцкага ў Ракаве атрымала дыплом 3 ступені ў намінацыі «сольнае выкананне». І, нарэшце, трэці фестываль стаў па-сапраўднаму шчаслівым для Яраславы і яе педагога: там піяністка заняла заслужанае першае месца! Так, у Наваполоцку на конкурсе «Натхненне» дзяўчынка атрымала дыплом 1 ступені.
Пераможны настрой падтрымалі сваімі ўдалымі выступленнямі і іншыя навучэнцы. На фестывалі маладых выканаўцаў імя Мікалая Пятрэнкі ў Полацку Анастасія Марозава (цымбалы, педагог Любоў Храмава) і Руслан Сяргун (фартэпіяна, педагог Таццяна Фярко) сталі першымі ў сваіх намінацыях, дыпломам 2 ступені была ўзнагароджана Дар’я Кострыкава (фартэпіяна, педагог Наталля Пілат). Дыплом удзельніка за сваё выступленне атрымала і Дар’я Ахрамовіч (педагог Дар’я Козыр).
Несумненна, запомніцца юным браслаўчанам і ўдзел у ХVІ-м Міжнародным конкурсе салістаў-акардэаністаў «Наўене – 2018», дзе Уладзімір Чагарын і Павел Лібік годна выступілі і былі адзначаны дыпломамі. Так, У. Чагарын (педагог Ірына Белусь) заняў 1 месца, а П. Лібік (педагог Ала Цітовіч) стаў трэцім на прэстыжным замежным мерапрыемстве.
Дырэктар Браслаўскай ДШМ Ганна Лабуць адзначае, што ва ўстанове ганарацца дасягненнямі сваіх навучэнцаў. А для астатніх юных музыкантаў гэта стымул і доказ таго, што ўпартыя заняткі музыкай прыносяць жаданы вынік.
■ Алена НАБЕЕВА.
