Не сакрэт, што дзеці з’яўляюцца самымі патрабавальнымі дэгустатарамі школьных абедаў. Таму поварам сталовых устаноў адукацыі даводзіцца пры строгім захаванні тэхналагічных нормаў гатаваць апетытна і смачна.
Прафесіяналізм і стараннасць калектыву сталовай СШ № 1 г. Браслава пацвярджае той факт, што пасля абедаў на сталах застаюцца толькі пустыя талеркі.
— Увесь час імкнёмся прыгатаваць такую ежу, — кажа повар Анжэла Плітнік, — каб дзеткі елі з задавальненнем да апошняй лыжкі. А калі працуеш з душой і добрым настроем, то любая страва атрымаецца смачнай.
Трэба адзначыць, што прафесія школьнага повара даволі цяжкая. Так, калі на абед аладкі, то яго працоўны дзень пачынаецца з трох гадзін ночы, бо трэба накарміць 570 школьнікаў, ды яшчэ і другі раз — наведвальнікаў групы падоўжанага дня. Да таго ж меню сёння вельмі разнастайнае. Несумненна, сучаснае абсталяванне і тэхніка аблягчаюць работу, але большасць тэхналагічных аперацый па-ранейшаму даводзіцца рабіць рукамі.
— У нашай сталовай, — адзначае дырэктар школы Тамара Стома, — працуюць добрасумленныя і адказныя жанчыны. У харчблоку заўсёды стэрыльная чысціня, і за час іх работы ніколі не было ніякіх нараканняў ці скаргаў з боку бацькоў, а дзецям ежа вельмі падабаецца.
І каб падзякаваць поварам за іх такую патрэбную і важную работу, на мінулым тыдні ў школе прайшло шчырае мерапрыемства, прысвечанае Міжнароднаму дню повара. Напачатку Т. Стома выказала віноўніцам свята сардэчныя словы ўдзячнасці, а затым старшакласнікі паказалі невялікі канцэрт, уручылі жанчынам кветкі, торт і прылады для сталовай.
Але ж і госці не засталіся без увагі: усе з задавальненнем частаваліся смачнымі піражкамі, са стараннем і з любоўю прыгатаванымі сапраўднымі прафесіяналамі сваёй справы. ■
Алена ПЯТУШКА.
Фота аўтара.
