Хлебаробы ААТ «Мяжаны» аднымі з першых у раёне распачалі ўборку збожжавых і рапсу. На палеткі азімага жыта выправілі 2 камбайны, другія два працягвалі малаціць насенне азімага рапсу.
Першыя намалоты даюць неблагія віды на ўраджай. На круг выходзіла па 26,6 цэнтнера з гектара. Як расказвала дырэктар акцыянернага таварыства Вольга Балочка, сёлета збожжавы клін гаспадаркі займае 1 070 гектараў. З іх 430 — азімыя і 640 — яравыя культуры. Яшчэ трэба будзе зжаць 140 га яравога рапсу. Дарэчы, уборку азімага завяршалі якраз у дзень нашай размовы — сераду. Безумоўна, нагрузка на камбайн у гаспадарцы высокая, але, як лічыць кіраўнік, гэта не надта страшная бяда, бо камбайнеры і вадзіцелі тэхніку рыхтавалі старанна, каб да мінімуму звесці прастоі. Напрыклад, Пётр Станкевіч, які нарыхтоўваў кармы на КВК-800, апошнім прыступіў да рамонту свайго збожжаўборачнага агрэгата, аднак выехаў на жніво разам з усімі і цяпер лідзіруе па намалотах. Вацлаў Завацкі — пенсіянер, аднак трэці год запар садзіцца за штурвал камбайна. Сёлета ён першым выправіўся малаціць рапс, а з чацвярга ўжо шчыраваў на пшанічным полі.
Непакоіць дырэктара тое, што падсеяныя па азімых культурах травы хутка пайшлі ў рост і, калі ўборачная кампанія па нейкіх прычынах зацягнецца, перарослыя травы створаць пэўныя праблемы ў ходзе работ.
ААТ «Мяжаны» — адзінае ў раёне сельгаспрадпрыемства, якое, акрамя ворахаў, не мае больш прадукцыйных сушылак, нават тыпу КЗС-20. Таму, каб зерне не згарэла ў буртах, першым чынам пачалі адгрузку яго ў залік дзяржзаказу, па якім трэба паставіць на хлебапрыёмныя камбінаты 210 тон пшаніцы і 190 — жыта. 70 з іх ужо адгружана ў Полацк.
Да таго ж, каб павысіць тэмпы перасушвання збожжа, у гаспадарку чацвёрты год запар прыязджае брыгада рабочых са Столінскага раёна, якая і забяспечвае бесперабойную работу сушыльнага комплексу. А з ворахаў у склады на ГАЗ-53, якому гадоў пад 40, зерне перавозіць Часлаў Лаўрыновіч, за плячыма якога 67 гадоў. І абодва ветэраны не падводзяць.
Рабочы дзень для механізатараў, што занятыя на жніве, пачынаецца ў 7 гадзін раніцы. У 8 ужо ўсе пакідаюць машынны двор, калі тэхніка працавала блізка і начавала там. Пачынаць жа абмалот з-за расы, як правіла, раней за 10 гадзін не даводзіцца. Затое вечарам камбайны працуюць дапазна. Для работнікаў арганізавана двухразовае гарачае харчаванне з дастаўкай у поле.
Такім чынам, можна сказаць, што пачатак жніва ў «Мяжанах» праходзіць напружана, але арганізавана і спакойна.
■ Аляксандр АЗЕВІЧ.
Фота аўтара.
