Восеньскія сельскагаспадарчыя кірмашы для жыхароў горада даўно сталі неад’емным штогадовым мерапрыемствам, на якім людзі прывыклі запасацца на зіму гароднінай, купляць фураж для жывёлы. А вось шырокамаштабны веснавы, мяркуючы па водгуках пакупнікоў, стаў для іх сапраўдным сюрпрызам.
У суботу, 22 красавіка, на аўтамабільнай стаянцы ля магазіна «Пінскдрэў» на веснавы кірмаш для браслаўчан прывезлі прадукцыю райспажыўсаюз, ААТ «Друйскі», «Слабодка-агра», «Браслаўскі райаграсэрвіс», Відзаўскі каледж, індывідуальны прадпрымальнік Аляксандр Каршуноў.
Трэба сказаць, што ў гэты дзень з раніцы надвор’е не надта спрыяла жаданню людзей выходзіць за пакупкамі: сыпаў то снег, то дождж. Аднак роўна за 10 мінут да аб’яўленай пачаткам гандлю гадзіны неба праяснілася і гараджане пацягнуліся на кірмаш. А яшчэ праз некалькі хвілін, калі над «малой плошчай» горада загучалі песні самадзейных артыстаў Дома культуры, пакупнікоў значна прыбавілася.
Перш за ўсё браслаўчане раскуплялі фуражнае і насеннае збожжа, насенне шматгадовых траў, якія прывезлі сельгаспрадпрыемствы, гародніну і насенную бульбу ў гандлёвых кропках райпа, саджанцы фруктовых дрэў і ягадных кустоў у А. Каршунова. Аматарам мясных прадуктаў прапанаваў самы разнастайны асартымент СВК «Маяк Браслаўскі». «Агравідзы» гандлявалі фаршам, «Друйскі» — бульбай, зернем, насеннем траў, ялавічынай. Збіўся з ліку, калі паспрабаваў лічыць розныя віды выпечкі, якія прывезлі на кірмаш кулінары Відзаўскага каледжа.
Па водгуках, якія збіраў на працягу гандлю ў браслаўчан, ідэя пра вядзення такога кірмашу ім вельмі спадабалася. У тым, што яго трэба паўтарыць яшчэ адзін раз, усе апытваемыя былі аднадушнымі. Карацей кажучы, браслаўчане чакаюць прадаўжэння.
■ Аляксандр АЗЕВІЧ.
Фота аўтара.