Хутка лета пачне адлічваць свае апошнія дзянькі. Калі школьнікі гэты час выкарыстоўваюць для таго, каб набрацца сіл перад новым навучальным годам, то іх бацькі заклапочаны зборамі дзіцяці ў школу. Адзенне, абутак, спартыўная форма, ранцы і тое, што ў іх трэба пакласці… Адным словам, спіс багаты, але без гэтага як першакласніку, так і вучню старэйшых класаў не абысціся.
Бацькоў хвалюе пытанне, дзе набыць усё неабходнае, ды так, каб не надта спустошыць кашалёк. Таму адны з іх адпраўляліся за пакупкамі ў буйныя гарады ці нават за мяжу, іншыя чакалі, калі асартымент неабходных рэчаў стане багатым і ў крамах нашага горада. Ці магчыма набыць усё неабходнае да школы ў райцэнтры высвятляла “Браслаўская звязда”.
У першую чаргу дзіцяці патрэбна школьная форма. Пошукі яе пачаліся з дзіцячага аддзела ўнівермага “Брас”. У пачатку жніўня адзення тут было столькі, што ламіліся паліцы. Цяпер яго стала крыху менш, і не выпадкова, бо, як зазначылі прадаўцы, гандаль ідзе актыўна. Кожны дзень сюды заглядваюць бацькі і без пакупак не выходзяць. Асабліва запатрабаваны канцылярскія тавары, абутак і спартыўная форма. Для хлопчыкаў тут можна выбраць касцюм ці асобна штаны, пінжакі, кашулі. Асартымент адзення для дзяўчынак і ўвогуле парадаваў: спадніцы, сарафаны, блузкі і касцюмы. Уся школьная форма выключна беларускай вытворчасці. Акрамя таго, ва ўнівермагу шмат розных дробязей для таго, каб укамплектаваць школьны ранец, ды і іх саміх удосталь.
Калі асобныя рэчы разбіраюць, тут жа заказваюць у пастаўшчыкоў новыя. Вось і ў той дзень, калі сюды завітала я, чакалі прывоз спартыўнай формы, жакетаў, джэмпераў і абутку. Асобна хочацца адзначыць разнастайнасць мадэляў. Калі два гады таму назад выбіраць магчыма было з чорна-шэрай гамы, то сёлета дызайнеры пастараліся — школьніка можна адзець у якасныя і стыльныя рэчы. Да таго ж, кожны дзень, акрамя панядзелка, палатка ад універмага з неабходнымі для школы рэчамі працуе і на рынку.
Гарадскі рынак становіцца другім пунктам у пошуках неабходнага для школы. У будныя дні тут можна набыць толькі канцылярскія прыналежнасці ды ранцы. А вось у нядзелю парадаваў багаты асартымент адзення, абутку і іншых дробязей, у асноўным замежнай вытворчасці. Так, касцюм на хлопчыка сярэдніх класаў тут можна набыць за 60 рублёў, а на старшакласніка — да 100 руб. Сарафаны для дзяўчынак каштуюць каля 50 рублёў, а касцюмы — прыкладна 90. Розную па мадэлях, кошту і якасці школьную форму ахвотна прымяралі, а потым і набывалі шматлікія пакупкі. Багаты выбар канцылярскіх тавараў не толькі на рынку, але і ў ГЦ “Віталіч”. Сшыткі, фламастары, каляровыя алоўкі, адным словам усё, што патрэбна дзіцяці. Асобныя школьныя прыналежнасці можна набыць у розных прыватных крамах. Што датычыцца кошту, то калі ўзяць канцылярскія тавары, то на іх у розных крамах ён вагаецца не значна. Можна і ў магазінах спажыўкааперацыі знайсці танныя рэчы, а можна і ў прыватных. Галоўнае, каб яны падабаліся школьніку.
Такім чынам, усё неабходнае для школы можна набыць і ў райцэнтры. Пры гэтым якога б кошту рэчы бацькі не куплялі, сума выйдзе не маленькая. І безумоўна, лепш за ўсё паклапаціцца пра пакупкі загадзя.
- Паводле ацэнак Міністэрства гандлю, у гэтым годзе беларускія прадпрыемствы прапануюць 400 мадэлей адзення дзелавога стылю для хлопчыкаў і дзяўчынак, амаль 300 мадэлей абутку. Кошт экіпіроўкі (уключаючы адзенне, абутак, школьна-пісьмовыя і канцылярскія тавары) вучня малодшых класаў ад Br150 да Br690, у тым ліку ад B100 да Br400 — адзенне і абутак; старшакласніка — ад Br200 да Br850, у тым ліку ад Br140 да Br500 — адзенне і абутак..
■ Таццяна ПЯТУШКА.
