Летнія канікулы школьнікі праводзяць па-рознаму. Але, думаю, найлепш ім 
запамінаецца час, праведзены разам з сябрамі ў школьных лагерах адпачынку. Вось і вучні Ахрэмаўскай школы штогод з задавальненнем запісваюцца ў палатачны лагер.
Сёлета перасоўны 9-дзённы палатачны лагер пад неардынарнай назвай “Ахрэмкі” праходзіў з 23 па 31 ліпеня. У яго запісаліся 15 дзяцей са старэйшых класаў. Сярод іх як вопытныя ўдзельнікі, так і навічкі. Арганізатары лагера паклапаціліся пра цікавую і насычаную праграму знаходжання ў ім. На працягу 9 дзён падлеткі на веласіпедах пераадолелі маршрут Ахрэмаўцы — Замошша — Далёкія — Богіна — Відзы — Каленкішкі — Ахрэмаўцы.
Кожны раз на новым месцы хлопчы-і і дзяўчынкі разбівалі палатачны гарадок, наладжвалі быт, неслі дзяжурства па лагеры. Днём — насычаная пазнавальная праграма. Так, дзеці абавязкова наведвалі месцы, звязаныя з Вялікай Айчыннай вайной. Таксама яны пабывалі ў гасцях у сведак тых падзей — вязняў канцлагераў, якія дзяліліся з імі ўспамінамі. Пазнаёміліся школьнікі ў час велавандроўкі па раёне з помнікамі архітэктуры, даведаліся пра гісторыю іх будаўніцтва, што значна пашырыла кругагляд вучняў.
Вечарам у палатачным лагеры адбываліся забаўляльныя мерапрыемствы. Дзеці ўдзельнічалі ў краязнаўчай гульні “Наш край”, конкурсах “Лепшы спартсмен і спартсменка”, “Містэр і міс турызм”, “Лепшы повар”, “Лепшая бардаўская песня” і інш.
— Нам падабаецца ў лагеры, асабліва начаваць у палатках. Цікава пераязджаць з месца на месца і кожны раз даведвацца пра нешта новае. Час пралятае хутка, бо кожны дзень насычаны, — дзеляцца школьнікі сваімі ўражаннямі.
— Нягледзячы на “палявыя” ўмовы пражывання, адпачынак для дзяцей мы імкнуліся зрабіць разнапланавым. Дэталёва прадумалі расклад дня, за перамогі ў конкурсах падрыхтавалі прызы. Для дзяцей было прадугледжана комплекснае 4-разавае харчаванне, абавязкова — гародніна і фрукты, сокі і саладосці, — адзначыла начальнік лагера Алена Арцімовіч.
Несумненна, палатачны перасоўны лагер пакінуў шмат уражанняў, якімі дзеці яшчэ доўга будуць дзяліцца са сваімі аднакласнікамі ў новым навучальным годзе.
■ Алена НАБЕЕВА. Фота аўтара.
