Армія з’яўляецца сапраўднай школай мужнасці. І кожны хлопец, які жадае стаць моцным і загартаваным, адным словам, сапраўдным мужчынам, павінен яе прайсці. Кожны год рады салдатаў папаўняюць каля сотні маладых браслаўчан.
Для нашага раёна стала традыцыйным урачыста праводзіць хлопцаў у армію падчас “Дня прызыўніка”. Вось і нядаўна ў гэты ўрачысты дзень 41 юнаку з нашага раёна, якія ў хуткім часе папоўняць рады Узброеных Сіл Беларусі, уручылі павесткі. Маладыя людзі год ці паўтара будуць фізічна загартоўвацца, атрымліваць новыя веды і навыкі, прывыкаць да армейскага жыцця і спасцігаць сапраўднае сяброўства ў пагранічных, унутраных і спецыяльных войсках.
Традыцыйна ў адрас заўтрашніх салдат у іх дзень гучаць добрыя словы і пажаданні. Першым з прывітальным словам выступіў раённы ваенны камісар Віталь Грамніцкі, які пажадаў юнакам прайсці гэты этап жыцця дастойна, мужнасці і хуткага вяртання дадому. Ён адзначыў, што “Дзень прызыўніка” невыпадкова праходзіць напярэдадні Дня Перамогі, бо заўсёды перад юнакамі як прыклад будуць іх дзяды і прадзеды, што абаранялі нашу краіну. Акрамя таго, ён зазначыў, што падчас службы браслаўчане заўсёды паказвалі сябе з лепшага боку, многія былі адзначаны кіраўніцтвам ваенных часцей як лепшыя. Да гэтага і заклікаў імкнуцца новае папаўненне.
Свае пажаданні і словы на дарогу маладым выказалі намеснік старшыні райвыканкама Вольга 
Вялічка, старшыні раённага савета ветэранаў Вера Сяліцкая, раённай арганізацыі ГА “Беларускі Саюз ветэранаў вайны ў Афганістане” Леанід Мікшта, в.а першага сакратара РК БРСМ Надзея Плясун. Пробашч Браслаўскай парафіі Станіслаў Мжыглуд таксама акрэсліў неабходнасць вайсковай службы ў лёсе сапраўднага мужчыны і благаславілі юнакоў на ваенную службу.
Не хаваючы сваіх хваляванняў, як і кожная маці, якая праводзіць сына на службу, перад прысутнымі выступіла маці будучага салдата Валянціна Валушка. Прызыўнікі ж, у сваю чаргу, абяцалі служыць дастойна, на гонар нашага раёна і Радзімы.
Не абышлося без конкурснай праграмы і невялікіх выпрабаванняў будучых салдат. Свае музычныя віншаванні ў адрас юнакоў дарылі і артысты РДК, зрабіўшы іх настрой яшчэ больш святочным.
Безумоўна, самым хвалюючым момантам мерапрыемства стала ўручэнне прызыўных павестак абаронцам нашай краіны з рук Вольгі Вялічка і Віталя Грамніцкага. Праз некалькі дзён хлопцы раз’едуцца па сваіх вайсковых часцях і нарэшце прымераць ваенную форму.
Таццяна Пятушка.
Фота аўтара.
