Пакуль не будзе вынайдзена вакцына для прафілактыкі і лякарства для лячэння свіней ад афрыканскай чумы, датуль будзе існаваць пагроза ўспышак захворвання. І яны, як сведчаць сродкі масавай інфармацыі, рэгулярна выяўляюцца ў нашых суседзяў: то ў Расіі, то ў Прыбалтыцы. А гэта значыць, што ні ў якім разе нельга забывацца пра тыя меры перасцярогі, якія паставяць перагароду пранікненню вірусу. Перадаецца ж ён пры прамым кантакце здаровай і хворай жывёл, праз кроў, скормліванні адыходаў, якія ўтрымліваюць вірус, разносяцца крывасоснымі насякомымі, грызунамі, транспартам і чалавекам.
У ахалоджаным мясе вірус жыве 150 дзён, у замарожаным — 1000, у вяндліне — 6 месяцаў, месяц — у падсцілцы і 10 тыдняў — у трупах.
І калі на буйных свінагадоўчых комплексах сельгаспрадпрыемстваў прымаюцца самыя строгія меры прафілактыкі, то прыватныя падвор’і пастаянна знаходзяцца ў зоне рызыкі. Каб не дапусціць пранікненне вірусу абавязкова выконвайце наступныя прафілактычныя мерапрыемствы:
– рэгіструйце свіней у мясцовых выканаўчых органах;
– не купляйце маладняк і прадукты забою па-за ўстаноўленымі месцамі;
– не завозьце свіней з іншых рэгіёнаў без дазволу ветслужбы;
– тэрмінова папярэджвайце ветэрынараў пра выпадкі захворвання і падзяжу;
– не забівайце жывёлу без агляду ветурача;
– вядзіце барацьбу з грызунамі і насякомымі;
– перад уваходам у хлеў усталюйце дэздыван, месца для мыйкі рук і іх дэзынфекцыі, набудзьце для гэтага спецыяльныя прэпараты, завядзіце асобнае адзенне для наведвання ў стойлаў;
– не скормлівайце свінням кампаненты жывёльнага паходжання (мяса, тлушч, кроў); карміце толькі грануляванымі кармамі, ці камбікормам, які прайшоў тэрмічную апрацоўку;
– не выпускайце свіней на свабодны выгул.
Аднымі з пераносчыкаў вірусу афрыканскай чумы з’яўляюцца дзікі. Таму калі вы выявіце іх трупы, абавязкова патэлефануйце па нумары 61-2-56 ці 61-2-05, або ў мясцовы орган улады.
Наталля Лоўшанка, галоўны ветурач раёна.
