Ва ўмовах жорсткай канкурэнцыі ў сферы гандлю праўленне раённага спажывецкага таварыства знаходзіцца ў пастаянным пошуку новых форм абслугоўвання кліентаў.
Так, у лютым з’явілася сетка магазінаў, якую аб’яднала гандлёвае ўнітарнае прадпрыемства “Браслаўград”. І пакупнікі, лічу, ўжо не маглі не заўважыць, як прыемна змянілася насычанасць іх разнастайнымі прадуктамі харчавання.
А ў апошняй дэкадзе красавіка ў Браславе адкрыліся яшчэ 2 новыя гандлёвыя кропкі райпа. Па вул. Энгельса замест “Мэблі”, якую перамясцілі ў “Дабрабыт”, пасля касметычнага рамонту пачаў працаваць “Магазін нізкіх цэн”. Плошча памяшкання дазволіла размясціць тут 3 асобныя секцыі — для тавараў па зніжаных і камісійных цэнах, рытуальных паслуг.
У першай знаходзяцца рэчы, на якія здымаецца гандлёвая надбаўка,— адзенне, абутак, гаспадарчыя тавары, мэбля, шмат сувенірнай прадукцыі.
У камісійны аддзел кожны чацвер ад грамадзян прымаюцца рэчы, зношанасць якіх складае не больш за 15%. Цэны на іх устанаўлівае сам кліент, але з улікам рэкамендацый таваразнаўцы, які знаходзіцца побач. Зараз тут найбольш жаночай вопраткі і абутку па цане да 100 тыс. руб. Ёсць і шырокі выбар практычна новых мужчынскіх касцюмаў па 300-400 тыс. руб. Пакуль што, па словах загадчыцы магазіна Таццяны Сільчонак, хутчэй распрадаецца дзіцячае адзенне. Пры гэтым заўважае, што тут могуць прымаць ад грамадзян на рэалізацыю і патрыманую мэблю — плошча памяшкання дазваляе.
У секцыі рытуальных паслуг ёсць усё неабходнае, каб выканаць абрадавыя дзеянні, праводзячы чалавека ў яго апошні шлях.
У посуднай жа краме, што адкрылася ва ўнівермагу “Брас” замест былога кафэ, шырокі для выбару асартымент керамічнага, фарфоравага, шклянога, пластмасавага, стальнога і іншага посуду. Адным словам, тут можна купіць на свой густ не толькі практычна усё, што паўсядзённа патрэбна гаспадыні на кухні, але і прыдбаць падарункавы набор.
І задумак, як і чым зацікавіць пакупніка, задаволіць яго запыты, у праўлення райпа шмат.
У прамысловых магазінах пастаянна праводзіцца акцыя “Дзень імянінніка”, падчас якой на ўсе групы тавараў на 10% прадугледжана скідка. Увогуле ж на розныя групы нехарчовых тавараў штомесячна аб’яўляецца паніжэнне цаны ад 10 да 15%.
Ва ўнівермазе “Брас” праводзіцца распродаж сезонных тавараў — абутку, верхняга адзення — з паніжэннем рознічнай цаны да 30%. А падчас акцый, праводзімых сумесна з беларускімі вытворцамі, такімі як “Калінка”, “БелКрэда”,”Ромгіль-Тэкс”, “Сцяг Індустрыялізацыі”, рознічная цана на швейныя і трыкатажныя вырабы паніжаецца аж да 45%.
Ёсць магчымасць у браслаўчан набыць тавары ў магазінах райпа і ў крэдыт.
Каб больш гібка рэагаваць на пакупніцкі попыт, праўленне райпа рашыла таксама стварыць на базе прамысловых магазінаў, размешчаных у Браславе і сельскай мясцовасці, адасобленае структурнае падраздзяленне. Пры гэтым разлічвае, што яго стварэнне дазволіць больш цесна супрацоўнічаць з айчыннымі вытворцамі прамысловых тавараў па такіх накірунках, як адкрыццё фірменных секцый, аддзелаў, правядзенне сумесных акцый і распродажу.
Казімір Пятушка.
Фота аўтара.
Прадавец 6 разраду Таццяна Сільчонак ( 40 год стажу работы ў сістэме райпа) прымае ў камісійны аддзел чарговую партыю ўцэненых тавараў.
