Штогод у кастрычніку, самым прогожым і стракатым восеньскім месяцы, сваё прафесійнае свята адзначае вялікая яркая сям’я работнікаў культуры.
Яны кожны дзень навідавоку: стваральнікі свята і выдатнага настрою, дораць людзям прыгажосць і эстэтычную асалоду. Без іх працы жыццё было б даволі сумным і нецікавым. Работнікаў культуры можна сустрэць у розных сферах жыццядзейнасці: яны спяваюць для нас, праводзяць экскурсіі, раскрываюць таленты, выдаюць кнігі, зберагаюць нацыянальныя традыцыі.
Радасная прыемная атмасфера лунала ў мінулы чацвер ў РЦК, дзе прайшла ўрачыстасць, прысвечаная гэтым неардынарным людзям. У фае ўстановы разгарнулася выстава мастацкіх вырабаў работнікаў культуры раёна, якая яскрава сведчыла пра шматграннасць іх інтарэсаў і магчымасцей. Прыгожыя мелодыі саксафона, якім віртуозна валодае педагог ДШМ Славамір Цітовіч, краналі душу і стваралі ўзнёслы настрой.
У глядзельнай зале сабраліся спецыялісты і ветэраны сферы культуры, а таксама госці свята.
Пасля прывітальных слоў элегантнай вядучай Алены Котавай намеснік старшыні райвыканкама Вольга Вялічка павіншавала культработнікаў Браслаўшчыны і падзякавала ім за актыўную грамадзянскую і жыццёвую пазіцыю, за адданасць сваёй прафесіі, пажадала здароўя, творчага запалу і натхнення. Затым уручыла Ганаровыя граматы: галоўнага ўпраўлення ідэалагічнай работы, культуры і па справах моладзі — намесніку начальніка аддзела ідэалагічнай работы, культуры і па справах моладзі Алене Котавай, раённага Савета дэпутатаў — хормайстру народнага хору ветэранаў вайны і працы РЦК Наталлі Няміра, райвыканкама — навуковаму супрацоўніку па фондавай рабоце раённага аб’яднання музеяў Аліне Выжыкоўскай.
Добрыя словы выказала калегам і начальнік аддзела ідэалагічнай работы, культуры і па справах моладзі Антаніна Абалевіч, групе работнікаў таксама ўручыла ўзнагароды аддзела.
Да віншавання прадстаўнікоў райвыканкама далучыліся кіраўнікі розных падраздзяленняў сферы культуры раёна.
Упершыню за шмат гадоў у гэты святочны дзень віноўнікі ўрачыстасці не працавалі на сцэне, а атрымлівалі асалоду ад добрай музыкі ў якасці гледачоў, бо са сваім канцэртам да іх завіталі калегі з Мёраў.
На першы погляд здаецца, што працаваць у культуры лёгка і прыемна — вакол радасная абстаноўка і ніякай руціны. Але тыя, каму давялося бачыць гэтую працу знутры, добра ведаюць, як часам цяжка дастукацца да кожнага сэрца і знайсці водгук у кожнага гледача. Тым не менш у гэтай сферы працуюць самаадданыя людзі, таму падчас урачыстасці пацікавілася ў некаторых, за што яны любяць сваю прафесію.
Алена Котава, намеснік начальніка аддзела ідэалагічнай работы, культуры і па справах моладзі:
— Мая прафесія нясе радасць людзям, дорыць ім святочны настрой. Вельмі хочацца, каб ён пасяліўся ў сем’ях і душах усіх культработнікаў раёна.
Вольга Садоўская, дырэктар Слабодкаўскага сельскага Дома культуры:
— Люблю сваю прафесію за фантазію, творчасць, за зносіны з людзьмі. Ні пра адну іншую не скажаш: на працу, як на свята.
Таццяна Кука, дырэктар раённай ЦКС:
— Мая прафесія дае магчымасць паказаць гледачам прыгожае, за гэта яе і люблю.
Ірына Ванага, дырэктар Богінскага сельскага клуба:
- Падабаецца дарыць людзям свята і радасць. А калі бачу ўсмешкі на тварах гледачоў, мне таксама становіцца светла на душы.
Алена Пятушка.
Фота аўтара.
