Пачалася доўгачаканая пара школьных канікулаў. Бясспрэчна, усе вучні марылі пра яе. Нарэшце яны адпачнуць ад заняткаў, дамашніх заданняў і цэлы дзень змогуць праводзіць на свежым паветры, купацца ці выправіцца з сябрамі ў вандроўкі па турыстычных сцежках. Але пры гэтым і дзецям, і іх бацькам трэба памятаць, што адпачынак можа стаць небяспечным. Таму напярэдадні летняга адпачынку дырэктар Урбанскага Дома культуры Святлана Алёхна для вучняў мясцовай школы правяла круглы стол з удзелам старшага інспектара па ахове прыроды нацыянальнага парка Андрэя Кудро, старшыні ТВВАД Анатоля Міласердава, інспектара нагляду і прафілактыкі РАНС Міхаіла Рыкуна і начальніка ІСН РАУС Валянціна Янковіча. Гутарка, падчас якой госці нагадалі школьнікам правілы паводзін на вуліцы, дома, на вадзе і ў лесе, атрымалася жывая, змястоўная і карысная.
Так, М. Рыкун паведаміў прысутным, што толькі за мінулы перыяд бягучага года ў Віцебскай вобласці адбыліся 504 пажары, дзе загінулі 73 чалавекі, двое з якіх дзеці. Таму ён нагадаў школьнікам пра небяспечнасць карыстання бытавымі электрычнымі прыборамі і піратэхнікай, адкрытага вогнішча на прыродзе. Інспектар РАНС расказаў, як паводзіць сябе ў той ці іншай сітуацыі ў выпадку ўзнікнення пажару.
Безумоўна, з надыходам сонечнага надвор’я ўсе імкнуцца выехаць на адпачынак у лес, на бераг ракі ці возера. Таму старшы інспектар па ахове прыроды нацыянальнага парка папярэдзіў, што адпачываць можна толькі ва ўстаноўленых месцах, а перад адыходам абавязкова трэба прыбраць за сабой смецце, засяродзіў увагу і на небяспечнасці полымя ў лесе.
З надыходам летніх канікулаў у школьнікаў з’вілася больш вольнага часу, а вось у супрацоўнікаў міліцыі больш клопату. Таму начальнік ІСН РАУС Валянцін Янковіч яшчэ раз нагадаў вучням пра адміністрацыйную адказнасць за распіццё спіртных напіткаў, ў тым ліку і піва, курэнне ў грамадскіх месцах, за адсутнасць флікераў, парушэнне правілаў дарожнага руху. Яшчэ адзін важны момант: калі вам няма 16 гадоў, то з 23.00 да 6.00 без суправаджэння дарослага нельга знаходзіцца на вуліцы. У гэтым годзе за такое правапарушэнне ўжо складзена 8 адміністрацыйных пратаколаў на бацькоў, прывёў прыклад В Янковіч. Супрацоўнік міліцыі таксама папярэдзіў пра жудасныя наступствы ад курыльных сумесей.
У спякотны летні дзянёк прахалодная вада, як магніт, цягне да сябе. Тым не менш яна прыносіць не толькі задавальненне, а і непапраўную бяду. І менавіта жахлівыя прыклады старшыні ТВВАД Анатоля Міласердава красамоўна пра гэта сведчаць. Прыгадаў ён і ўсім вядомы факт, што вада не любіць п’яных і свавольства. Затым
А. Міласердаў дасціпна расказаў і паказаў на прыкладзе, як трэба ратаваць тапельца.
Празвінеў апошні званок. Пачалося лета. Наколькі яно будзе сапраўды радасным для школьнікаў, залежыць не толькі ад работнікаў устаноў адукацыі і культуры, але і ад саміх дзяцей. Таму пастарайцеся не азмрочыць канікулы дрэннымі паводзінамі і ўчынкамі. Ну а бацькам патрэбна яшчэ больш кантраляваць сваіх сыноў і дачушак, у якіх значна прыбавілася вольнага часу.
Алена Пятушка.
Фота аўтара.
