Дарогі пакрысе рамантуюць

Актуальное

Мабыць, усе, хто так ці інакш карыстаўся сёлетняй вясной нашымі дарогамі, адзначылі для сябе іх дрэнны стан. Месцамі выбоіны можна было прапусціць паміж коламі, недзе – прытармазіць і такім чынам мінімізаваць наступствы для аўтамабіля і ўласнага вестыбулярнага апарата, але сустракаліся ўчасткі, якія інакш, як па абочыне, і не аб’едзеш.

Аднак на працягу апошніх тыдняў браслаўскія дарожнікі крыху выправілі становішча. Так, сіламі ДЭУ-34 ужо пакладзены новы асфальт на ўчастку 2,3 кіламетра на аўтадарозе Р27 ля Опсы. Вядуцца работы па паверхневай апрацоўцы дарожнага палатна на працягу3 кмна трассе Р3 паміж Азяраўцамі і Ахрэмаўцамі. Больш-менш прыведзены ў парадак кавалак асфальту ад Заборных Гумнаў да АЗС, што ля Друйкі.

Што датычыцца гарадскіх вуліц, то за іх стан адказвае ДП “Браслаў-камунальнік”. Як паведаміў начальнік аддзела ЖКГ райвыканкама Іван Бялусь, у хуткім часе новы асфальт з’явіцца на такіх праблемных участках, як вуліца Ленінская каля аўтастанцыі (250 м) і ўезд у горад з боку Полацка ля дома-інтэрната для састарэлых (100м).

Такім чынам, дарогі былі і застаюцца прадметам абмеркавання ў простых грамадзян і кропкай сутыкнення інтарэсаў пэўных службаў. Аднак хочацца спадзявацца, што агульнымі намаганнямі ўдасца палепшыць стан нашых дарог ці як мінімум не пагоршыць яго.

Вячаслаў Каладынскі.

Добавить комментарий

Ваш e-mail не будет опубликован. Обязательные поля помечены *